الخميس، 10 يوليو 2008

حملة التعريف بكلية الحاسبات و المعلومات



السلام عليكم و رحمة الله و بركاته
هو ليه يا جماعه كل سنه بنقول الدفعه دي أسوأ من اللي قبليها


هو ليه أوائل الثانويه العامه في الكليه قليلين جداً ان وجدوا أساساً


هو ليه لما بنقعد نتكلم مع قرايبنا عن الكليه بيحسسونا اننا بنتكلم عن حاجه مش موجوده في مصر


كل ده يدل علي شئ واحد ان الناس مش عارفين عن الكليه ولا مجال شغلها والخ...

ده احنا نفسينا مكناش عارفين لغاية سنه تانيه

:D

طب و بعدين يعني يا أبو سعد !؟

أقولك يا سيدي ليه منعملشي موقع للتعريف بكلية الحاسبات و المعلومات

أو حتي يبقى جروب على الفيس بوك للتعريف بالكليه

طب الناس هتوصلنا ازاي يا أبو العُريف !؟
هقولك
مش طلبة الثانويه العامه هم التارجيت بتاعنا
طبعاُ, بس هنوصلهم ازاي يا عبقرينو !؟

ليه منروحشي نسلم على أساتذة الثانويه العامه بتوعنا و نعلق عندهم ورقه أو بوستر و فيها تعريف مبسط للكليه و لينك للموقع أو الجروب اللي هيبقي على الفيس بوك
والله فكره يا أبو سعد
طب متدخل معانا في الحمله دي و تعدي كده علي الأساتذه
وعلى فكره بقه الأساتذه بيفرحوا جداً لما بيلاقوا حد كان بياخد عنده درس و جاي يسلم عليه
بعد ما دخل الكليه و لا حتى خلصها
والله انا مجربها و بجد احساس حلو أوي ان الاستاذ يبقى فخور بيك كده قدام الطلبه

و يا سلام لو نبقي نعلق البوسترز دي في الكليه و في أماكن تسجيل الرغبات !!!؟
ويا سلام لو نعدي كمان على مدارسنا بتاعة اعدادي
ليه لأ !
و كمان في الجلسات العائليه أو الأعياد نكلمهم عن الكليه أو نوزع عليهم الورق ده , ليه لأ برده !؟
و نتكلم عن اننا مهندسين برده مش تجاره و ان القبض عندنا حلو برده و كده !!
ها يا شباب حاسبات و أمل الأمه في نهضه حقيقيه بجد !؟
حد معانا
حد عنده اقتراحات
حد ناوي يعمل حاجه ياخد عليها ثواب و يبدأ في حاجه و الناس تقتدي بيه و ياخد قد ثوابهم كلهم
مستني ردودكم !!؟
و السلام عليكم و رحمة الله و بركاته