السلام عليكم و رحمة الله و بركاته
-----------------------
أهلاً و سهلا ًبكم قسمي العزيز
ازيكم أخباركم ايه يا رب خير ان شاء الله ...
يا رب تكونوا قريتوا المقاله اللي لسه كاتبها قبل دي
طيب أدخل في الموضوع على طوول
أولاً : أنا فضلت ان الموضوع يبقى هنا علشان اللي عايز يقوول رأيه يقوله و بدون احراج (يا ريت ماحدش يعلق على الحته دي , عايزين نركز علي المشكله الرئيسيه)
و عايز أقول قبل ما أبدأ : اننا كلنا دلوقتي في قسم واحد و كلنا عايزين نطلع بحاجه في اخر سنه في الكليه
نطلع بحاجه يعني نطلع بحاجه مفيده مش نمشي حالنا و نخرج من السنه زي ما دخلنا ...
مممممممممممممم
طيب, بصوا يا جماعه انا اتكلمت مع بعض طلبة القسم و اتناقشنا في الموضوع ده و كانت النتيجه كالتالي (بس يارييت كله يشارك و يقوول رأيه و يمضي في الاخر باسمه أو اسم مستعار) ... و ياريت برضه يبقى الهدف من الرد اننا نوصل بالكلام ده لأحسن وضع ممكن
أولاً: زي ما كتبت في المقاله السابقه اننا لازم نشوف المشاكل اللي في كل ماده و نحاول نحلها
فياريت نركز علي حاجه حاجه
فبدايةً
Mathematical Programming
لو سألتوا الناس بتوع السنه اللي فاتت هيقولولكم استفيدوا من د\ياسر ده على قد ما تقدروا و ماتخلووش الماده عباره عن ألجوريزم الطابعه التانيه ... حاولوا تاخدوا حاجه جديده حاجه تستفيدوا بيها مش تاخدوا نفس الحاجه مرتين
ف بصرف النظر عن الماده دي رياضه و لا برمجه و لا الاتنين مع بعض
ف عايزين نوصل بيها لأحسن وضع
و كانت المبادره من الدكتور النهارده (أي نعم كان فيه مشاكل و هوه ده اللي جايين نناقشه)
المشكله يا جماعه أن احنا اتعودنا على نظام معين في الشرح و في طريقة التلقين و الطريقه الروتينيه في الشرح ...الخ
لكن في الناحيه التانيه في ناس بتشرح بطريقة طلع اللي جوه الناس , اعرفهم أكتر , ناقشهم أكتر , خليهم يناقشوا بعض أكتر (بالأخص ان عددنا قليل)... خليهم يقترحوا حلول
( انتم مش واخدين بالكم اننا كقسم سينتيفيك )ممكن نطلع طريقة حل جديده لمشكله معينه و ناخد بيها جايزه و نرفع بيها ترتيب الجامعه...!!؟
ليه لأ ..!!؟
انتوا عارفين ان طريقة المناقشه دي لو وصلنا بيها لأحسن وضع كل واحد فينا هيطلع حاجه جديده و يكتشف انه يقدر يعمل أكتر من اللي هوه متخيله..!!؟
طب تخيل كده مثلاً الدكتور قال يا جماعه عايز المره اللي جايه فلان يحَضَر حل للمشكله الفلانيه علشان هيشرحها لينا كلنا المره اللي جايه في عشرة دقائق مثلاُ و هنتناقش فيها كلنا لمده عشرين دقيقه مثلاً .. أو أكتر , ده مجرد اقتراح
و ده يبقى جزء ثابت في المحاضره أسبوعياً
اقتراح اخر
ليه مانتعاونشي كلنا في حل مشكله كبيره أو ابتكار ألجوريزم جديد مثلاً و كل واحد يعمل حاجه فيه يدور مثلاً علي النت و يقول أنا لقيت أحسن حاجه كذا و التاني يقول و انا لقيت كذا و نقعد نتناقش فيها
ليه لأ...!؟
يا جماعه الحاجات دي و غيرها لو اتعملت صح هتفرق معانا كتييييييييير باذن الله ...!!
أنا عارف ان الموضوع بيبقي صعب على الكل في أوله , بس بص لقداااام
و رووح و قووول لأي معيد أو حد كبيير أو خبره واثق في كلامه تصدق حصل كذا كذا كذا النهارده في القسم و احكيله براحتك بدون اظهار وجهة نظرك و قل له في الاخر ايه رأيك !!!؟
المهم
مستني ردودكم و اارائكم و اقتراحاتكم
فقط اضغط على تعليقات اللي تحت دي
then choose anonymous >>The third option
واكتب براحتك و متستنااش تشوف ردود الناس و متنسااش تمضي باسمك أو باسم مستعاار
and finally press on the button>> publish your comment
و
السلام عليكم و رحمة الله و بركاته
.jpg)
هناك 6 تعليقات:
السلام عليكم ورحمة الله وبركاته
أولا أنا بشكرك يا سعد إنك فكرت إنك ترفع من حال القسم ... أنا عارفة إن ده هدف القسم كله بس المشكلة فى التعبير , أنا كان لي تعليق على إلي حصل فى محاضرة د.ياسر أنا طبعا فرحت جدا إن الدكتور فتح معانا سكة جديدة للشرح وهي حلقة النقاش الجماعي بس لازم تتنفذ بالطريقة الصح بحيث نقدر نستفيد من النقاش على قد ما نقدر فى وقت المحدد من المحاضرة ... أولا بتتيح لينا فرصة عرض أفكار بعضينا فى حلول للمشاكل وطبعا بنكسر الجواجز إلي بينا ... ومنها نقدر نصل إلى أحسن حل نتيفأ عليه ..وطبعا معانا الدكتور .. أنا بجد موش عايزة نعيد كورس الألجوريثم تاني زي ما هو ... أنا نفسي نقدر نعرف الألوريثم الخاص بينا ...نفسي نتطلع من الكورس لو أبلتنا أي مشكلة نعرف نعرفها ونجيب ليها ألجوريثم ويكون كمان الأوبتبمال ..وده إلي عايزين نعمله فى ماده البرمجة الرياضية ... بس المشكلة فى حاجة إن لازم يبقى فيه شوية كنترول فى الموضوع علشان نعرف ننفذه صح ...أنا من وجهت نظري أن نسيب مساحات لكل القسم بالكلام .. أكيد كلنا بنفكر وكلنا نقول الحلول إلي شايفنها إنها الصح بس فى إطار منظم موش هاقول بالترتيب .. بس إلي يقول طريقة حل للمشكلة أولا يحاول يختصر فى الكلام يعني يقول الفكرة عامة ويضرب بيها بمثال (هيكون أحسن علشان هيقرب من الفهم أكتر للنظربة) علشان الوقت وعلشان الباقي يعرف يشترك فى النقاش ...ده تعليق بالنسبة لحلقة النقاش خاصة فى محاضرة دكتور ياسر.. أنا عندي ملحوظة جامدة جدا.. لاحظت إننا كلنا بنتكسف نقول إحنا موش فاهميين ... تعرفوا ليه علشان إحنا موش عارفين نربتها بالواقع...لازم نقول ياجماعة ... شوفتوا النهاردة أول ما أحمد سعد قال لدكتور أحمد فاروق أنا موش فاهم ... الدكتور شرح تاني من الأول بس بأمثلة من الواقع كان بيقرب من الموضوع ززأولا فهمنا وكمان عرفنا هي المعادلة ديه ممكن أحل بيها مشاكل إية ... صورة المادة بتوضح سنة سنة لو مشينا على نفس المنوال إن لو موش فاهمين يشرح تاني وبأمثلة ... ولازم كل الموجدين يكونوا كده موش 2-3 بس ...المسألة محتاجة سوية جرأة....وبكده هنتطلع بالكورس فاهمينوا والأحسن نعرف نتظبقه فى الحياة لما تقابلنا أي مشكلنة نعرف هي تبع أ مجال علشان أعرف ألاقي حل ليها وإن شاء الله ربنا يوفقنا يارب و نستفيد من جميع المواد... إحنا بدئنا بالمكان إلي أعدين فيه...خلينا إيد واحدة ونساعد بعضينا فى رفع مستوى القسم ....يا سينتيفيك (يا أحــــــــــــلــــــــــــى قســـــــــــــــــــــــــم ) .... يلا كفاية أنا طولت أوي فى الكتابة....
ســـــــــــــــــلام
الى الامام يا احمد انت وجروب اس سى
الحقيقة يا سعد انا مبسوطة من اللى حصل فى المحاضرة ومبسوطة كمان انك فتحت الموضوع لأنى فعلا كنت عايزة اتناقش فيه معاكم.
اولا كانت خطوة كويسة من د. ياسر انه استجاب لطلبكم ووافق على انه مايكررش نفس المواضيع اللى اخدتوها السنة اللى فاتت وجميل كمان انه فتح باب المناقشة معاكم وسابكم انتم اللى تتكلموا.
ولكن اللى حصل امبارح فى المحاضرة محتاج شوية لتظبيط واننا نتفق عشان نقدر نستفيد بأكبر قدر ممكن من الفرصة.
أولا انا باقول ان مبدئياً احنا ممكن كلنا نتفق على بعض المشاكل المهمة اللى نحب ندرسها وتكون مفيدة ومتنوعة وكلنا نشارك فى وضعها. طبعا نجيبها من النت أو لو حد يعرفها المهم كأننا احنا اللى هانحط ال syllabus بتاع المادة
ثانياً: نعرض ال syllabus ده على د. ياسر وهو أعتقد انه هايوافق وياريت يكون جاهز على المحاضرة اللى جاية بحيث اننا نقدر بعد المد ترم مباشرة نبدأ فيه.
ثالثاً: كل واحد يشارك باضافة موضوع فى المنهج يقدم ليه مراجع م النت او اى سورس كويس يعرفه وطريقة المحاضرة تكون كالآتى: نوزع المواضيع علينا كلنا وممكن أكتر من شخص يشتركوا فى نفس الموضوع لأن طبعا عدد المحاضرات اللى فاضله مش كتير يعنى مثلاً كل جروب يشترك فى تحضير موضوع او اتنين بالكتير وهو اللى يقوم بعرض وشرح الموضوع فى المحاضرة للباقين فى نفس الوقت يكون باقى الناس عارفه الموضوع وقرياه من ال مراجع اللى تمت اضافتها قبل ما يجوا المحاضرة
بالنسبة للشرح فى المحاضرة لازم كل جروب يبقى محضر كويس وتقسموا الشرح على بعض و يكون الموضوح محدد وواضح يعنى يبدأ بالفكرة ثم الألجورثم و بعدين نفتح الموضوع للتعليق او لو حد عنده فكرة تحسن من الموضوع وده طبعا يكون بشكل مختصر عشان الموضوع مايكبرش
كمان عايزة اقول نصيحة للشخص اللى هايكون بيشرح وده طبعا من واقع الخبرة انه لازم يتكلم من مستوى الشخص المتوسط ومايعلاش اوى عشان لازم نراعى كل المستويات والناس كلها تفهم ومفيش حد يبقى متضايق كمان لازم يكون محدد ومايخرجش كتير عن الموضوع وميديش فرصة ان الموضوع يكبر اوى عشان يقدر يوصل اللى هو عايزه والناس تستفيد.
بعد كده هايكون مطلوب من الجروب اللى شرح المحاضرة دى مثلاً انه بعد الشرح والناس فهمت الحمد لله يقدم المحاضرة فى تقرير مكتوب وفيه الشرح اللى اتقال مكتوب كويس ومضاف عليه الأفكار الجديدة اللى اتقالت من الناس بشكل واضح ويوزعها على الناس فى المحاضرة اللى بعدهااللى هايكون الدور فيها على جروب تانى عشان ده يكون المرجع ليكم عشان المذاكرة
طبعا مافيش مانع ان كل جروب وهوا بيحضر ان فى الأخر يكون مجهز سؤال او جزئية ممكن يزودها على المشكلة وتتساب للناس كلها بحيث ان ده يكون موضوع البحث اللى الدكتور طلبه فى آخر المحاضرة.
ده اللى أنا فكرت فيه وطبعا اتمنى ان لو حد عنده اى افكار تانيةأو تعدبل فى اى حاجة قولتها يعرضها بحيث اننا نقدر نتفق ونبتدى الشغل وأنا ممكن بعد ما نتفق اعرض الفكرة على د. ياسر
أخيرا أحب اقولكم انى مبسوطة جدا وحماسكم فعلا خلانى اتحمس معاكم وأحب اقولكم انى معاكم فى اى حاجة وشكرا يا سعد
جزاكي الله خيراً يا دكتور ...
و منقدرشي ننسى مساعدة حضرتك لينا
;)
بجد أكتر من رائع...
و ان شاء الله هنجمع الألجورزمات المقترحه و هنبعتها قريباً
but , i suggest something about the syllabus , I think that we can get a syllabus from MIT or Virginia ...etc
As they most probably have Mathematical Programming course ...
ALLAH AL Mosta3an ...
يا جماعه فييين باااقي القسم...!!؟
يا ريت يا جماعه نشووف اارائكم و اقتراحاتكم , شاركونا يعني .. هتيجوا في الاخر و تقولوا ياااه احنا عملنا كذا , ده كان شبه مستحيل
شاركونا العمل و النهضه و التغير
مستنينكم
سلام مؤقت
مفيش مشكلة يا سعد أنا زى ما قلت ممكن نجيب من أى مكان طالما هايفيدنا و فكرة كورسات البرمجة الرياضية فى جامعات تانية فكرة كويسة.
أنا كان هاحاول أساعد وأجهز حاجة المهم ان كل الناس تشترك لأن ده الأساس عموما لو مش كل الناس شافت الحوار ده كلمهم انت فى الكلية واعرض الفكرة والكل يبدأ فى التنفيذ وخلينا نتفق على يوم الأربعاء فى السكشن نقعد ونظبط اللى جبناه ان شاء الله
بالمناسبة: روميل ده كان قائد الجيش الألمانى فى مصر أثناء الحرب العالمية الثانية وكانت معروف عنه الشجاعة والقوة والدهاء والمكر وأكيد طبعا انت عارف ان ليه شاطىء باسمه فى مرسى مطروح وليه متحف هناك لكن اللى انا معرفوش هوا ايه وجه الشبه بينك وبينه؟؟؟
أكيد هبة ادرى طبعا :)
أنا فقط واضاف صفحة ويب إلى المفضلة. أحب قراءة رسائلك. شكرا!
إرسال تعليق